Од синоќешната NBA програма, го издвојуваме дуелот помеѓу Лос Анџелес Лејкерс и Хјустон Рокетс, во “Стејплс” центарот. Во “Ел-Еј” навивачите беа сведоци на исклучително возбудлив и неизвесен меч.
Првото полувреме од натпреварот изобилуваше со течна и ефикасна игра, на обете страни од теренот. Расел Вестбрук го диктираше темпото а Ентони Дејвис редовно забиваше во рекетот. Вториот пик на последниот драфт, Џејлен Грин, беше најконкретен во нападот на гостите. Постигнуваше тројки од преку девет метри и без никакви проблеми го пробиваше рекетот за атрактивна завршница. 
Леброн Џејмс ја најави својата доминација пред крајот на првото и почетокот на второто полувреме. По неколку перфектни контра напади, во кој ги вклучи Диандре Џордан и Ентони Дејвис, лејкерси отидоа на +6 во третиот дел од мечот. Кевин Портер јуниор и Кристијан Вуд одговорија со иста жештина, и го вратија младиот тим од Тексас во игра. Кармело Ентони уште еднаш докажа дека има уште многу да понуди. Погодуваше од дистанца, за три поени и заедно со својот пријател, Леброн Џејмс, го враќаат водството. 
Положувањето на Кент Бејзмор на 90 секунди до крајот донесе високо водство за домаќините од +10. Тогаш следуваше серија од 9-1 којa го врати Хјустон во игра. Портер јуниор имаше шанса за победа, но неговиот обид беше неуспешен. Конечни 119-117 за лејкерси. Леброн Џејмс беше лидер за “градот на ангелите” со 30 постигнати поени, следен од Расел Вестбрук и Ентони Дејвис кој постигнаа по 27 поени. На спротивната страна, водечки кај “ракетите” беше Кристијан Вуд со дабл-дабл учинок од 26 поени и 16 скокови, следен од Џејлен Грин со 24 постигнати поени.
NBA FAN
Димитар Младеновски
