По три мандати, Едмонд Темелко од Македонска алијанса за европска интеграција (МАЕИ) изгуби на локалните избори што се одржаа вчера во Албанија. За нов градоначалник на Пустец е избран Пали Колефски од Алијансата за европска Албанија.
Според првичните резултати, Колефски освоил 1.505 гласови, а Темелко 859.
Темелко во 2016 година, по налог на специјалното јавно обвинителство беше уапсен од македонската полиција и одведен на сослушување во кривичниот суд за случајот „Титаник“ во кој е осомничен за злосторничко здружување и за повреда на избирачкото право. За истиот случај, тој беше и во притвор – прво во истражниот затвор во Шуто Оризари, а потоа беше префрлен во куќен притвор.
Според резултатите на изборната комисија, Пустец, општина со доминантно македонско население во Албанија, е општина со најголем одѕив на гласачите со 55,44 отсто или 7.724 гласачи.
