Кривични пријави се поднесени против 17-годишната мајка од тетовско Желино која го остави своето новороденче пред Домот за доенчиња од Битола, како и против нејзиниот невенчан 27-годишен сопруг и нејзиниот татко.
МВР денеска соопшти дека целосно е расчистен случајот и оти пријавата против малолетната мајка е поднесена поради основано сомнение дека сторила кривично дело „напуштање на немоќно дете“.
Поради основи на сомнение дека сторил кривично дело „вонбрачен живот со малолетно лице“ до Основното јавно обвинителство во Тетово пријавен е невенчаниот сопруг Ш.А. од тетовското село Долна Лешница, а за истото дело се сомничи и 38-годишниот Б.А. од тетовско Желино, кој и дозволил на малолетничката да живее во вонбрачна заедница.
