Скопскиот градоначалник Петре Шилегов објави дека интензивно се работи на изградбата на новиот мост во рамки на проектот за пробивање на булевар АСНОМ со кој од Аеродором до Мавровка , како што вели тој, ќе се стигнува за 5 минути.
„Интензивно се работи на мостот на бул. АСНОМ. Од Аеродром до Мавровка за помалку од 5 минути. 6 коловозни, две велосипедски и две пешачки патеки. Нови коридори во нашиот град“, напиша Шилегов на Фејсбук.
Градот пред две години ја започна постапката за изградба на коридор за поврзување на Аеродром, Гази Баба и Центар. Новиот проект освен нов мост преку Вардар во должина од 120 метри предвидува и пробивање на нов и реконструкција на стар булевар во вкупна должина од 2170 метри, 5 вкрстувања, 6 коловозни ленти, велосипедски патеки во двете насоки, пешачки патеки и дрвореди. Новиот коридор во градот задолжително ќе биде проследен и со нови автобуски линии на јавниот градски превоз.
