Наде Талевска Спасовска несомнено е еден од најдобрите вокали на домашен терен. И покрај квалитетите кои ги поседува, пејачката реши да се повлече од поп-музиката и веќе не снима и работи како порано. Причина за тоа се валканите игри кои, според нејзините кажувања, биле застапени на естрадната сцена и поради кои решила да стави крај на соло кариерата, па сега е посветена само на ангажманот кој го има во Македонската опера и балет каде е вработена веќе неколку години, пишува Вечер.
“Разочарана сум од валканите игри кои се играат и затоа решив да се повлечам. Посветена сум на работата во Македонската опера и балет, во моментов се спремам за настап со Сараевската филхармонија каде ќе гостувам заедно со уште неколку колеги, после тоа заминувам со хорот “Злата Мегленска” на натпревар во Фиренца, Италија, а покрај хорскиот дел, ќе се натпреварувам и во соло-категорија каде ќе изведам неколку теми. Кон крајот на јули заедно со хорот одиме во Шпанија, каде исто така ќе учествуваме на натпревар и сигурна сум дека и таму ќе доминираме”, вели Наде на која и е поприлично весело низ дома со оглед на фактот што е мајка на три деца.
“Кај нас дома секогаш е весело, разиграно, динамично, но и полно со љубов. Нервози има, со три деца не може да ги нема, но кога се сака, се се може. Ми помага сопругот, тука се и бабите и дедовците и успевам да излезам на крај со се”, додаде Наде.
