Рускиот ракетен систем „Панцир-С1“ (според НАТО стандардот SA-22 Greyhound) со ракети земја-воздух од комбиниран, краток и среден домет, пристигнува во соседна Србија.
Белград ќе го добие ракетниот систем за неколку месеци, потврди директорот на руската агенција за извоз и увоз на оружје „Рособоронекспорт“, Александар Михејев.
Србија во последните неколку месеци забрзано набавува оружје од Русија, а тоа се случува како одговор на вооружувањето на соседите, првенствено Хрватска и Албанија. Самиот претседател Александар Вучиќ изјави дека Србија се вооружува затоа што сака да остане слободна земја.
Според српскиот претседател, тој точно знае колку ќе купуваат Хрватска и Албанија и се прашува зошто се крева паника кога се вооружува Србија, а не и Хрватска.
Сепак, во меѓувреме за Србија пристигна една непријатна вест. Утре во Белград пристигнува Томас Зарзецки, лидер на работната група „231“ при американскиот Стејт Департмент, работна група која е задолжена за примена на санкции против рускиот безбедносен сектор, како и тие кои што соработуваат со Русите.
Томас Зарецки веројатно на претседателот на соседна Србија ќе му го повтори тоа што неодамна му го кажа и Мајкл Палмер, американскиот претставник за Балканот – дека и Србија ќе се соочи со санкции доколку купува руско против-ракетно вооружување.
Сепак, Вучиќ призна дека Србија едноставно нема пари за да може да си ги дозволи руските против-воздушни системи од типот „С-300“ и „С-400“.
