Бројот на постигнати голови во дебитантската сезона во Серија А сугерира дека Кристијано Роналдо одлично се снашол во италијанскиот фудбал. Реалноста е сосема спротивна – Португалецот игра катастрофално лошо и само поради доминацијата на Јувентус во однос на другите екипи успева да тресе мрежи во континуитет.
Потврда за тоа стигна и на вчерашниот дуел против Болоња кој Јувентус го доби со 1-0 благодарение на голот на Пауло Дибала. Роналдо беше невидлив на теренот, а од водечките италијански медиуми доби најлоши оценки. Газета дело спорт, Кориере дело спорт и Тутоспорт го почестија со 5, исто како и весниците кои не се специјализирани: Кориере дела сера, Ла Република и Ла Стампа. Единствено Ил Џорнале беше малку дарежлив, па му даде 5,5.
Според алгоритамот на статистичкиот портал WhoScored, ова беше втор најлош натпревар на Роналдо во Серија А. Оценката 6,43 е повисока само од онаа во дуелот со Киево кога доби 6,40.
