Бугарија доби нова редовна влада, а кабинетот на Радев ќе треба да се справи со буџетот, судските реформи и европските фондови.
Бугарија доби нова редовна влада, откако парламентот го избра Румен Радев, лидерот на „Прогресивна Бугарија“, за нов премиер. За неговата кандидатура и структурата на Министерскиот совет гласаа 124 пратеници, сите од неговата партија, 70 беа против, а 36 пратеници од ГЕРБ-СДС се воздржаа. Составот на кабинетот беше одобрен со 122 гласа „за“.
Со гласањето во Народното собрание, Радев и неговиот министерски тим ја презедоа власта во момент кога Бугарија се обидува да излезе од долгиот период на политичка нестабилност. Според Reuters, „Прогресивна Бугарија“ победи на парламентарните избори со 44,6 проценти од гласовите, што ѝ овозможи самостојно да формира влада без неопходна коалициска поддршка.
Новиот кабинет на Радев ќе има четворица вицепремиери и 18 министерства. Меѓу клучните имиња се Галаб Донев, кој ќе биде задолжен за финансиите, Велислава Петрова-Чамова како министерка за надворешни работи, Иван Демерџиев за внатрешни работи и Димитар Стојанов за одбрана. Дел од министрите веќе биле дел од технички влади поврзани со Радев, што опозицијата го искористи како аргумент дека новиот кабинет не носи доволно свежина.
Од „Прогресивна Бугарија“ порачаа дека со кабинетот се враќа „нормалноста“ во бугарската политика и дека министрите се избрани според компетентност, а не според партиски договори. Претставниците на опозицијата, пак, го критикуваа составот на владата, оценувајќи дека во него има луѓе со спорни биографии и недоволна експертиза за реформите што земјата треба да ги спроведе.
Пред новата влада стојат неколку итни задачи: усвојување на буџетот, судски реформи, мерки против корупцијата и отклучување на европските средства од Планот за закрепнување и отпорност. Во исто време, Радев ќе биде под внимателен надзор и од Брисел и од сојузниците во НАТО, поради неговите претходни позиции за Украина и односите со Русија.
