Пандев: Велат дека не можам да трчам, но јас сакам да бидам како Пирло

58

Македонскиот ветеран во екипата на ЏеноваГоран Пандев, на подготовките доби нова улога во тимот. Тренерот Аурелио Андреацоли го постави како играч за врска што ја изненади јавноста, а и нашиот репрезентативец кој вели дека му годи промената.

„За мене беше чудно, бидејќи цела кариера ја поминав играјќи во нападот. Тренерот зборуваше со мене и ми ја сподели идејата. Јас сакам да играм како играч за врска, единствениот проблем ќе биде трчањето“, вели 35-годишниот голгетер.

Пандев се пошегува на своја сметка поради возраста и се спореди со големиот Андреа Пирло. Легендата на италијанскиот фудбалер без многу напор ја извршуваше својата задача на средината од теренот и токму тој е пример за нашиот интернационалец.

„Сите се шегуваат со мене и ми велат дека нема да имам капацитет да играм во средината од теренот. Но, јас сакам да сум како Пирло. Креаторот на играта постојано размислува и има многу допири со топка. Знаете дека само се шегувам“, низ смеа рече македонскиот напаѓач.

Пред почетокот на сезоната, нашиот фудбалер ја продолжи соработката со Џенова и ќе ги брани боите на клубот уште најмалку една година.

loading...