Додека коронавирусот се шири низ светот, докторите не само што мора да се борат за животите на пациентите, туку мора да се борат и против лажните вести кои се шират како огнена стихија.
Поради ова, угледниот германски виролог Кристијан Дростен и повеќе од 100-тина доктори и останати здравствени работници се обратија до јавноста со отворено писмо.
„За спасувањето на животи и враќање на довербата во лекувањето засновано на науката, неопходно е технолошките гиганти да престанат да шират лаги, извртени информации и фантазии кои не доведуваат во опасност“, пишуваат авторите.
Според нив, технолошките компании имаат „многу големо влијание“ и се одговорни за сузбивањето на „смртоносното ширење на лажни информации“. Германските доктори бараат од Фејсбук, Гугл, Твитер и останатите „интернет гиганти“ да го спречат ширењето на лажните вести во врска со коронавирусот.
Како што пренесуваат германските медиуми, повод за објавувањето на ова писмо е актуелната пандемија на коронавирусот, во која лажни вести како таа дека кокаинот е лек против вирусот, или Ковид-19 е развиен како биолошко оружје, побрзо се шират од самиот вирус.
Во писмото е наведено дека напорите на технолошките компании во сузбивањето на лажните вести не се ниту приближно доволни. Тие не само што на платформите го овозможуваат ширењето, туку и заработуваат од тоа.
