Откриена е причината за смртта на познатиот американски актер и комичар Боб Сагет.
Сагет беше пронајден мртов во својата хотелска соба на 9-ти јануари оваа година, во Орландо, Флорида, само ден по неговиот стенд-ап настап, а сега неговото семејство ги открило деталите и причината за неговата ненадејна смрт.
Имено, комичарот починал од повреда на главата за која веројатно не мислел дека е опасна, велат од семејството.
„Властите заклучија дека Боб починал поради повреда на главата. Заклучено е дека со тилот случајно удрил во нешто, мислел дека не е ништо опасно, па заминал на спиење“, стои во изјавата кое ја дало неговото семејство.
Полицијата веднаш ги отфрли наводите дека Сагет починал како последица на дрога и алкохол, што веднаш и беше потврдено, а се веруваше дека станува збор за инфаркт или мозочен удар.
Боб беше погребан на 14-ти јануари во Лос Анџелес, а зад себе ги остави сопругата Кели Ризо и трите ќерки Лара, Обри и Џенифер.
Сагет од 1987 до 1995 го толкуваше таткото вдовец во серијата „Full House“, како и во продолжението „Fuller House“ од 2016 до 2020 година, а исто така го водеше и шоуто „America’s Funniest Home Videos“ од 1989 до 1997 година.
