Четириесет и деветгодишниот Киро Стојов од Кочани ја доби најпрестижната награда на манифестацијата „Story Awards“ и беше прогласен за „Стори-личност на годината“ поради хуманиот гест што го направи неодамна, а тоа е донирање орган на човек со кој што не е во крвно сродство.
Тој заедно со своето семејство пристигна на церемонијата, а признанието му го врачи министерот за здравство, Венко Филипче, кој го поздрави овој негов гест, а сите присутни во салата станаа на нозе и со овации му се поклонија на Киро.
Инаку, давањето орган за пресадување од жив донатор е редок случај, не само за македонски услови, туку и за поширокиот балкански простор. Воедно, се смета за највисок пример на хуманоста. Токму Стојов е меѓу неколкуте благородни луѓе кај нас, чиј случај за доброволно донирање дел од црниот дроб за лице со кое не е во роднински врски, па токму поради тоа го сврте вниманието и на регионалната академија на „Стори“, која без дилема едногласно одлучи токму тој да ја добие наградата за „Стори-личност на годината“.
