Француската влада повикала денес на смирување на тензиите по судирот меѓу полицијата со демонстрантите во Нант, кои протестирале поради смртта на момче кое било убиено од полицаец, кога со возило се обидело да го избегне контролниот пункт.
Момчето, во раните 20-ти години, го удрило полицаецот кога тргнало во рикверц кај контролниот пункт, а тогаш на него пукал друг полицаец, пренесува “Reuters” повикувајќи се на полициски извори.
Демонстрантите вчера палеле автомобили, кршеле продавници, фрлале молотови коктели кон полицајците, а запалиле и неколку згради во Нант, град на западот на Франција.
Нередите се смириле во раните утрински часови, откако полицијата добила засилување.
“Повикувам на апсолутно смирување на ситуацијата и апсолутно почитување на владеењето на правото”, изјавила француската министерка за правда, Никол Белубе.
Полициски извори навеле дека започнала истрага во врска со постапката на полицаецот кој пукал во момчето.
