Еврокомесарот за проширување, Јоханес Хан, во интервју за австриски „Стандард“ вели дека е запознаен со закани од страна на опозицијата против пратеници кои сакаат да ја напуштат партиската линија и да го поддржат Договорот со Грција во Собранието. Тој од ВМРО ДПМНЕ побара да се откаже од, како што вели, деструктивниот пристап, и интересите на земјата и граѓаните да ги стави пред партиските. Додава дека партијата целосно ќе ја сноси одговорноста за затворањето на вратите на ЕУ за Македонија, ако не помине Договорот.
-Ова е целосно неприфатливо за партија која вели дека е про-европска, демократска партија, изјавил Хан.
Тој потсетува дека евроатлантската интеграција е декларирана цел на ВМРО ДПМНЕ, но дека партијата тоа треба да го докаже на дело и дека Договорот со Грција ги отвора токму вратите за интеграција во ЕУ и НАТО.
За еврокомесарот референдумот бил чисто консултативен и огромно мнозинство од граѓаните се изјасниле „ЗА“.
– Повиците за бојкот сведочат за недостаток од демократската зрелост, рече еврокомесарот.
Јоханес Хан смета дека предвремени избори носат ризик од пробивање на поставените рокови за Договорот за името и вели дека се сомнева дали Грција ќе биде во можност да го усвои во својот Парламент. Тој додава и дека нови избори не се гаранција за потребното двотретинско мнозинство.
– Сега постои шанса што треба да се искористи, во спротивно оваа единствена шанса да помине Договорот и со тоа патот кон членство во ЕУ може да се изгуби за долго време, можеби засекогаш, изјави Хан.
Тој додава дека ВМРО ќе биде целосно одговорно за таквото сценарио и пропуштената шанса што е важна не само за Македонија, туку и за целиот регион.
Австрискиот весник истакнува дека во моментов се водат повеќе процеси против високи челници на партијата и дека крилото на партијата што сѐ уште му е лојално на Никола Груевски се обидува да капитализира преку отпорот против Договорот од Преспа.
И македонскиот претседател Ѓорѓе Иванов, кој, според „Стандард“, ги застапува руските интереси, исто така, се противи на договорот што ги отвора вратите на земјата за членство во НАТО и ЕУ.
