Двата дена за изборите ќе бидат неработни и нема да се одработуваат

170

Од Владата потсетуваат дека 24 април и 8 мај се прогласени за неработни денови за сите граѓани на територија на државата и додаваат дека овие два дена нема да се одработуваат

Деновите на одржување на претседателските и парламентарните избори – 24 април и 8 мај – кои Владата уште минатата недела ги прогласи за неработни за сите граѓани, нема да се одработуваат.

Ваква одлука била донесена на вчерашната владина седница.

„Владата заклучи 24 април (среда) и 8 мај (среда) да бидат неработни денови за сите граѓани на Република Северна Македонија, заради непречено спроведување на изборите за претседател и изборите за пратеници во Собранието. Овие два неработни дена нема да се одработуваат“,соопштија од Владата по вчерашната седница.

Оттаму информираат дека одлуката се однесува на сите граѓани на територија на државата.

Минатата недела Владата одлучи деновите на одржување на изборите да бидат неработни за сите граѓани, а на работодавачите од приватниот сектор им препорача да ги спроведат овие заклучоци.