Актерката Силвија Стојановска и нејзиниот поранешен сопруг Воислав Будисављевиќ на првото рочиште пред судот кажаа дека не се чувствуваат виновни за делата за кои се гонат од Обвинителството за гонење организиран криминал.
Двајцата во воведните зборови се произнесоа дека не се поврзани со кокаинот, односно со негово купување и продавање во количина од близу 700 килограми, како што стои во обвинението.
Стојановска останува во куќен притвор, а Будисављевиќ во притвор, додека следното рочиште е закажано за почетокот на идниот месец. Тие немаа воведни зборови пред судот, но одговорија потврдно кога беа прашани дали го разбираат обвинението.
Актерката и нејзиниот поранешен споруг, според обвинителниот акт, организирале сместување, купување, превезување на дрогата од Мадрид и барале купувачи за истата.
„За да не бидат откриени во нивните постојани активности, обвинетите меѓусебно комуницирале со користење на енкрочат телефонски мобилни уреди, како и енкрочат мобилни апликации со заштитени канали, а користеле и уред за детектирање на евентуална полициска инсталација и на дигитални преноси за примена на посебни истражни мерки – инхибитор“, велат од Обвинителството.
Судот претходно го прифати барањето на Обвинителството и ги продолжи мерките за обезбедување присуство за двајцата обвинети. Актерката Стојановска веќе неколку месеци се наоѓа во куќен притвор, а, пак, Будисављевиќ во притвор. Двајцата беа приведени на крајот од месец декември минатата година.
