Капитенот засега не објавува официјално дали ќе игра и понатаму во жолто-црвениот дрес, но со оглед на неговата возраст тој момент сигурно ќе се случи во скора иднина. По неговото пензионирање, според ракометарот на Вецлар, Македонија ќе има проблем дури и да се пласира на некое од големите натпреварувања.
„Слушам многу приказни за светлата иднина на македонскиот ракомет, како и понатаму ќе се пласираме на Европските и Светските првенства. Не се согласувам со тоа. Кога Кире ќе се повлече од репрезентацијата, ќе ни биде тешко воопшто да се пласираме на големите натпреварувања. Ќе биде дури и претешко со новиот систем на квалификации за СП. Се надевам дека ќе биде добро, но реалноста не е таква. Немаме кој да го замени Лазаров, особено не на позицијата десен бек. Во следните 3-4 години ќе мора да се потпреме само на Талески и Кузмановски и ќе ни биде навистина тешко да дојдеме до опопиплив резултат“, изјави Миркуловски во разговор за „Балкан хендбол“.
Ветеранот, кој веќе има 37 години, во моментов настапува за германски Вецлар, а во дресот на Македонија има 126 настапи со 315 постигнати голови.
