Влатко Стефановски: Господ не ни дава повеќе товар отколку што можеме да поднесеме

340

Во тие многу тешки периоди, најмудрите реченици ги доживеав од најмудрите луѓе. Во знак на утеха, како знак на сочувство, чув неколку мудри работи. Една од нив морам да ја споделам. На Матка, бевме минатото лето, со сопругата.

Сретнав една калуѓерка и ѝ се пожалив дека поминуваме низ многу тежок период. А таа ми кажа една реченица која е многу моќна: Господ не ни дава повеќе товар отколку што можеме да поднесеме. И тоа е една многу голема вистина, и очигледно дека овој товар што го носам сега бил наменет за мене

Влатко Стефановски (61) во период од само една година се соочи со две, како што самиот вели, за него необјасниви семејни трагедии. По загубата на сопругата Гордана, минатиот месец по кратко боледување почина и неговиот брат, еден од најзначајните македонски драматурзи Горан Стефановски.

Легендарниот македонски гитарист, како и многупати досега, утеха најде во музиката. Ова го открива за хрватското издание на магазинот „Глорија“ во очи на неговиот вечерашен концерт во Загреб.

Сопругата Гордана која му беше животна партнерка и најголема поддршка изминативе три и пол децении, почина лани. Во февруари годинава, Влатко даде ексклузивно интервју за „Женски магазин“, меѓу другото зборувајќи за тој исклучително тежок период на приватен план.

– Пред една и пол година син ми доживеа сообраќајна несреќа и се повреди многу страшно, и со тоа се занимававме подолго време. За жал, пред три месеци почина мојата сакана, драга сопруга со која што поминав триесет и пет години. Тоа е една огромна загуба за мене, една огромна дупка во мојата душа и се обидувам преку музиката да се спасам.

Се обидувам свирејќи да го изразам сето она што се случува во мене, и за момент да најдам утеха, иако тоа е многу тешко. Сега се грижам за моите деца, ги решавам нивните проблеми, а кога ќе дојде ред и на мене, ќе решам некои и од моите проблеми – изјави Стефановски за Женски Магазин.

За „Глорија“ пак, Влатко нагласува дека мора да остане силен поради децата – ќерката Ана (30) која во Падова заврши докторски студии по италијански јазик и книжевност и синот Јан (18), кој годинава матурираше.

Веста за неговиот брат го затекна на турнеја во Австралија. Оттогаш, Стефановски нема објавено ниту една фотографија или статус на социјалните мрежи.