Талат Џафери повикал обезбедување во Собранието поради однесувањето на координаторот на пратеничката група на ВМРО-ДПМНЕ, Никола Мицевски.
До ова дошло откако Мицевски отишол на местото каде што седи пратеничката Даниела Марковска од СДСМ и ѝ зборувал на уво, поради тоа што Џафери не му дал процедурално обраќање.
За тоа време, пратениците од ВМРО-ДПМНЕ тропале на клупите. За да не ѝ го земе микрофонот, пратеничката Марковска со него шетала низ салата. Мицевски сметал дека Џафери мора да му даде процедурално обраќање, бидејќи тоа право му следува по Деловникот, а не да го игнорира и збор да добиваат други пратеници.
„Никола Мицевски, тргни се од таму“, рекол Џафери додека пратениците на ВМРО-ДПМНЕ тропале по масите, а собранискиот спикер продолжил: „Никола Мицевски тргни се од таму, не ти е таму местото. Даниела продолжи со зборување“.
„Обезбедување, обезбедување, тргнете го координаторот од туѓо место, не му е место таму“, вели Џафери.
Во тој моментот на седницата се дискутирало за стратегијата на Антикорупциската комисија. По ова, претседателот Талат Џафери дал пауза, согласно ковид-протоколите.
