Еден од најмладите членови на македонската репрезентација Филип Талески е исклучително задоволен од изданието во Рејкјавик, во квалификацискиот дуел против Исланд.
Македонија победи и сега е многу блиску до пласман на континенталниот шампионат во 2020 година. Сепак, младиот бек на Рајн Некар призна дека е револтиран од некои работи последните месеци.
„Мора да бидеме задоволни од оваа победа, точно е дека примивме многу голови, но и дадовме многу. Во првите 15 минути одбраната беше слаба и тоа Исланд го искористи. Подоцна ја сменивме формацијата во одбраната и дојдовме до победата. Одлично е ако успееме од двата натпревара да освоиме четири бода, тоа ќе однесе на Европското првенство.
Што се однесува до мојата игра, секогаш сакам да бидам меѓу носителите, но и револтиран сум од македонската јавност која постојано плука по нас. Тоа ми дава екстра мотивација“, изјави Талески.
