Семејството на славниот австриски возач потврдило дека починал трикратниот светски шампион.
Ники Лауда, легендарниот возач на Формула 1, починал во 71-вата година од животот, потврдило неговото семејство.
“Со длабока тага објавуваме дека нашиот сакан Ники почина мирно во кругот на семејството во понеделникот. Неговите единствени остварувања како спортист и бизнисмен ќе останат незаборавени како неговата жед за акција и неговите директност и храброст. Тој е пример за сите нас, беше добар сопруг, татко и дедо и ќе ни недостасува”, порачало семејството во соопштение објавено од Австрија.
Ники Лауда е трикратен шампион во Формула 1. Титулите ги освојувал во 1975-та, 1977-ма и 1984-та, а возел на 171 трка.
Лауда имал проблеми со здравјето уште од 1976-та година, кога преживеал страшен пожар, по една несреќа на трка во Нирбургринг. Неговиот болид целосно се запалил, а Лауда од него излегол со тешки изгореници и здравствени проблеми кои подоцна го следеле целиот живот.
Имал две трансплантации на бубрег, една во 1997-ма, кога неговиот брат Флоријан му го донирал органот, а другата во 2005-та, кога донор била неговата сопруга Бриџит.
Исто така, минатата година имал трансплантација на бели дробови, па набрзо се разболел од грип и имал здравствени проблеми од кои бавно се закрепнувал. Минатиот месец бил пренесен во приватна клиника поради проблеми со бубрезите.
Лауда во 2012-та година бил поставен за претседател на Мерцедес и бил најзаслужен за доведувањето на актуелниот шампион Луис Хамилтон.
