Граѓанските здруженија кои се против работата на извршителите ја продолжуваат својата битка како што велат до конечна правда. Своите маки, но и проблемите на огромен број на граѓани, му ги претставија и на претседателот на државата Стево Пендаровски. Според нив, тој бил запрепастен кога ги чул тешкотиите со кои се соочуваат некои граѓани. Пендаровски ветил дека ќе разговара со премиерот Заев и ќе се обидат заеднички да ги решат проблемите.
Има примери, му презентиравме на претседателот, граѓанин земал кредит пет илјади евра или триста илјади денари, замислете кога ни ги покажа документите – требал да врати еден милион и двесте илјади денари. Толку е целокупниот долг што треба да го врати. Тоа е веќе неиздржливо – изјави Марјан Ристески „Стоп за Извршителите“.
Граѓанските здруженија се жалат дека ниту новиот закон за вршење на извршителската дејност не се почитува. Тврдат дека и натаму се наплаќа по старо, за минимални суми се бараат огромни долгови за наплата.
Еве на пример Водовод кој до некаде го почитува законот. Оди граѓанин во Водовод и вели дајте според законот да го платам долгот без камата. Тие не сакаат да наплатат и ги праќаат граѓаните кај извршителите, а знаете кога ќе отиде граѓанин кај извршителите Господ знае што сè ќе му наплати извршителот – рече Марјан Ристески „Стоп за Извршителите“.
Претходно граѓанските организации имаа средба и со премиерот Заев и со ресорните министри, но засега нема ништо од тие средби. Ставот пак на Комората на извршители останува непроменет. Оттаму велат дека со новиот закон и начин на наплата драстично им се намалила заработката и биле принудени да отпуштат голем број вработени во оваа дејност. Во земјава има 101 извршител, а во самата дејност работат околу 600 лица. Податоците на здруженијата велат дека, само лани во Македонија извршителите издале 400 илјади извршни решенија, а од граѓаните и фирмите биле наплатени над една милијарда евра.
