По единаесет години порази, Македонија реди историски успеси и граѓаните нема да дозволат деструктивни сили да ја закочат македонската иднина, се вели во ракцијата од владејачката СДСМ во однос на прес-конференцијата на Димче Арсовски од ВМРО-ДПМНЕ.
„После 11 години изолација, поделби, деструкција и назадување заради криминалното владеење на ВМРО-ДПМНЕ, после 11 години порази на внатрешен и надворешен план, Македонија денес конечно реди историски успеси и победи. И покрај деструктивното и анти-државно однесување на ВМРО-ДПМНЕ, Македонија одлучно оди напред по нејзиниот пат кон ЕУ и НАТО, пат што е точно определен“, се наведува во партиското соопштение.
Од СДСМ истакнуваат дека Македонија добива покана за полноправно членство во НАТО на следниот самит на Алијансата и додаваат дека веќе добила и датум за преговори со Европската унија.
„Тоа е остварување на стратешките интереси на Македонија и нејзините граѓани. Единствено ВМРО-ДПМНЕ не може да го прифати успехот на Македонија што е препознаен, признаен и вреднуван од целата јавност и целиот демократски свет. Му се допаѓало тоа на ВМРО-ДПМНЕ или не, времето на изолација, конфликти и поделби заврши. СДСМ, граѓаните и институциите нема да дозволат деструктивните сили да ја закочат македонската иднина. Македонија тргна напред и враќање назад нема“, стои во соопштението.
Од владејачката партија истакнуваат дека доколку ВМРО-ДПМНЕ навистина е за членство во ЕУ и НАТО тогаш ќе даде поддршка на Договорот со Грција кој, како што велат, го обезбедува идентитетот и ги остварува националните и државни интереси.
