Мајами Хит остана во игра. Иако десеткувани од повреди и сметани за големи аутсајдери, сепак успеаа да стигнат до триумф. Во третиот натпревар од финалната серија, тимот од Флорида го победи Лос Анџелес Лејкерс со 115:104 и така намали на 2:1 во серијата. “Жешките” со балансирана и дисциплинирана игра докажаа дека не се случајно Источни шампиони.
Мајами потполно заслужено стигна до првата победа во големото финале. Имаа водство од почетокот на натпреварот, а на стартот од третата четвртина имаа и максимални +14 (68:54).
Меѓутоа, Лејкерси го возвратија ударот и успеаа да намалат на стартот од последната четвртина. Mајами успеа да се врати со одлична игра во финишот и дојде до двоцифрена предност за конечна победа.
Натпреварот на кариерата го одигра Џими Батлер кој оствари трипл-дабл со неверојатен учинок од 40 поени, 11 скокови и 13 асистенции. При отсуство на Бем Адебајо и Горан Драгич поради повреди, одлична партија пружија дебитантот Тајлер Хиро како и центарот Кели Олиник кој заедно постигнаа по 17 поени.
NBA FAN
Димитар Младеновски
