Американскиот претседател Доналд Трамп не се обидува да влијае на девизните пазари, рече денеска министерот за финансии на САД, Стивен Мнучин. Тој повтори дека силниот американски долар ја одразува силната американска економија и е во долгорочен интерес за САД.
Пред новинарите во Буенос Аирес, американскиот министер за финансии посочи дека тој и Трамп целосно ја поддржуваат независноста на американската централна банка. Американскиот претседател во последните денови упати критички коментари за силата на доларот и монетарната политика на Управата за федерални резерви.
Мнучин е во Буенос Аирес по повод денеска почнатата средба на министрите за финансии и централните банкари од групата Г-20. Меѓу учесниците се директор на ММФ, Кристин Лагард, претседателот на Светската банка Џим Ким и шефот на Европската централна банка Марио Драги, потсетуваат агенциите.
Главниот состанок ќе се одржи денеска, откако ќе се разговара за ризиците и можностите во глобалната економија. Вториот состанок ќе се занимава со развојот на пазарот на трудот и финансиската инфраструктура. Овие две прашања се приоритет за аргентинското претседателство на Г20 оваа година.
