Компанијата „Магнометал“ ДООЕЛ објави дека од 1 јануари 2026 година започнува пилот-проект за воведување на 4-дневна работна недела за своите вработени, без намалување на платата.
Ваквата одлука ја прави „Магнометал“ првата трговска компанија во Македонија и поширокиот регион што храбро го усвојува овој модел, поставувајќи нов стандард за продуктивност и работна култура.
„Како трговска компанија, нашиот успех директно зависи од ефикасноста и фокусот. Убедени сме дека 4-дневната работна недела ќе ја зајакне благосостојбата на нашиот тим и ќе ја оптимизира нашата оперативна продуктивност“, изјави Радослав Галиќ, сопственик и управител на компанијата. „Ова е доказ дека одличната работа може да се постигне попаметно, а не подолго“.
Компанијата очекува дека воведувањето на 4-дневната работна недела ќе придонесе за повисока продуктивност, како и подобар баланс помеѓу работата и приватниот живот на вработените, како и за привлекување и задржување на врвни таленти преку современи и флексибилни услови за работа.
Како ќе функционира?
Пилот-проектот ќе трае шест месеци, а резултатите ќе се мерат според вкупната продуктивност, задоволството на клиентите и ангажираноста на вработените. За да се обезбеди непречена услуга, компанијата ќе користи стратегии како дежурства, за клиентите да не почувствуваат прекин во квалитетот на услугата.
Останува да се види дали и други македонски компании ќе се осмелат да го следат овој пример, инспирирани од успешните искуства на компаниите ширум светот кои веќе го применуваат овој модел на работа.
