Бојан Јовановски, кој е еден од обвинетите во случајот „Рекет“ на денешното рочиште упати низа на обвинувања на сметка на обвинителката Вилма Русковска.
Јовановски денес побара збор во судницата, при што најави дека со неговиот тим ќе поднесат низа на кривични пријави, од кои некои се против обвинителката Вилма Русковска.
„Јас со мојата одбрана сакам да поднесам 19 кривични пријави“, порача Јовановски во судницата, а потоа ја обвини Русковска за корупција.
„Дали лицето Вилма Русковска да го пријавам кај обвинителката Вилма Русковска? Каде да го пријавам лицето Вилма Русковска за корупција од 4 милиони евра, за што имам несоборливи докази?“, запраша Јовановски.
На тоа, судијката Васка Николовска-Масевска објасни дека има право да побара изземање на обвинител, но дека местото за такво нешто не е судот.
