Портпаролката на грчката влада, Аристотелија Пелони, денеска изјавила дека епидемиолошката ситуација во Грција е влошена.
“Во последните десет дена забележан е пораст на случаите и драстичен пад на просечната старост на нашите сограѓани заразени со вирусот на 27 години. Во јужните области на Атина, каде е утврдена посебно висока стапка на позитивни лица, околу 66 проценти од случаите се на возраст меѓу 15 и 24 години”, изјавила Пелони на прес-конференцијата, пренесува “ANA”.
Утврдено е, како што додава, дека заразувањето на помладите од 30 години е поврзано со забавите, поради што, како што истакнала, ќе бидат применети построги мерки во рестораните, баровите, клубовите и ноќните клубови.
“Целта е наредниот период да се убедат оние кои се двоумат или се сомневаат во безбедноста и ефикасноста на вакцината да ја искористат привилегијата на вакцинација”, изјавила Пелони.
Истакнала дека Грција е во нова фаза на пандемијата.
“Во рацете имаме штит кој го немавме во претходната фаза: вакцина – до која сите граѓани имаат универзален, бесплатен и директен пристап. Вакцините се ефикасни, делуваат и не штитат. Тие што не се вакцинирале, треба да го направат тоа веднаш”, вели Пелони.
