Во засолниште со муниција на Министерството за одбрана на Украина, 176 километри источно од Киев, рано изутринава дојде до експлозија и пожар, поради што се евакуирани околу 10.000 луѓе, соопштиле официјалните лица.
До експлозија дошло рано наутро пред 03:30 часот во засолниште со муниција во регионот Чернигов, после што изби пожар, соопшти Генералштабот на украинските вооружани сили, пренесува Тас с.
Засега нема податоци за евентуални жртви и не е јасно дали станува збор за саботажа или до експлозијата дошло сосема случајно, пренесува Ројтерс, кој наведува дека избиле повеќе експлозии.
#Ukraine ammo depot explosion near #Chernihiv pic.twitter.com/eQqKlcg0Jd
— Aijaz (@anaijaz) October 9, 2018
Од 04:22 часот по локално време, воздушниот простор на Украина е затворен во круг од 20 километри од засолништето, додека копнениот и железничкиот сообраќај е во застој, соопштува службата за вонредни ситуации.
Стотина лица се распоредени на лице место, се наведува во соопштението, а таму се упатил и началникот на вооружаните сили.
Британската агенција потсетува дека изминатите години забележани се повеќе големи пожари во засолништата со муниција и оружје во Украина и напоменува дека украинската војска се бори против проруските активисти на истокот на земјата од 2014 година.
Се потсетува дека и минатата година, поради експлозии од големи размери во воените засолништа во региониот Виницја, 270 километри од Киев беа евакуирани 24.000 луѓе.
