Товарен авион на DHL се урна во понеделникот околу 4,30 часот по средноевропско време во близина на аеродромот во Вилнус во Литванија, при што загина едно лице а три се повредени, изјавија за Reuters претставници на аеродромот, полицијата и пожарникарите.
Авионот, управуван од авиокомпаниите SWIFT во име на DHL, се урна врз куќа, изјави портпаролот на владиниот Национален центар за управување со кризи. Сите луѓе во куќата преживеале, додаде тој.
Пожарникарите во 6.30 часот полевале со вода чад што се издигал од зградата на околу 1,3 километри северно од пистата на аеродромот во главниот град на Литванија. Спасувачките служби соопштија дека авионот удрил во земјата и се лизнал најмалку 100 метри пред да се урне во зградата.
Во областа било забележано големо присуство на полиција и брза помош, а неколку околни главни улици беа затворени. Полицијата на прес-конференција соопшти дека 12 лица биле евакуирани од куќата што ја удрил авионот.
Началникот на литванската полиција денеска изјави на прес конференција дека не може да се исклучи терористички напад како причина поради која товарен авион се урна рано утрото во близина на аеродромот во Вилнус.
„Тоа е една од верзиите што треба да се истражи и да се потврди. Има уште многу работа пред нас“, рече Арунас Паулаускас на прес-конференција.
Шефот на литванската спасувачка служба Ренатас Пожела на прес-конференција изјави дека авионот се урнал на неколку километри од аеродромот, се лизгал неколку стотини метри, а неговите остатоци погодиле двоспратна куќа. Авионот бил товарен авион кој летал за DHL кој полетал во Лајпциг во источна Германија.
„Куќата има два ката, четири стана, а таму живееле три семејства. Сите 12 жители се безбедни“, рече Пожела.
Портпаролката на литванската спасувачка служба рече дека авионот бил целосно уништен од пожар предизвикан по уривањето.
