Поранешниот косовски претседател Хашим Тачи се изјасни за невин пред Судот за воени злосторства во Хаг. Тој се соочува со обвиненија за извршени воени злосторства и злосторства против човештвото за време на војната пред повеќе од 20 години за независност на Косово.
Тачи беше командант на Ослободителната војска на Косово (ОВК) за време на војната 1998-1999 година. Тачи си поднесе оставка на функцијата претседател на 5 ноември откако дозна дека Специјалното косовско обвинителство го потврди обвинението против него.
Тачи пред судот рече дека е невин и дека не се согласува со обвиненијата за воени злосторства. Тој вети дека ќе соработува со Трибуналот.
Тачи и уште двајцата поранешни членови на ОВК, Кадри Весели и Реџеп Селими, беа одведени во притвор на 5 ноември. Од Судот преку соопштение наведоа дека првото рочиште било за да се осигура судијата дека обвинетиот ги разбира обвиненијата против него и дека му се почитуваат правата.
На 4 ноември пак во притвор во Хаг заврши Јакуп Красниќи, кој беше поранешен претседател на парламентот и портпарол на ОВК за време на војната. И Красниќи се изјасни за невин по обвиненијата.
