Уште пред неколку дена се појави информација дека капитенот Серхио Рамос влегол во жесток конфликт со претседателот на Реал Мадрид Флорентино Перез и дека поради тоа сака да си замине.
Сепак, во текот на вчерашниот ден се појави информација дека причината за кавгата била токму желбата на Рамос да си оди и неговото инсистирање дека треба да биде пуштен тоа да го направи бесплатно поради астрономската понуда која ја добил од Кина.
Тоа го потврди и првиот човек на Реал, Флорентино Перез, кој истакна дека нема да му ја исполни желбата на капитенот и дека Кинезите треба да дојдат и да преговараат за слободата на стоперот.
„Немавме состанок во неговиот дом, туку тој дојде во мојата канцеларија со својот менаџер и ми кажа дека има многу важна понуда од Кина. Побараа да го ослободиме бесплатно, бидејќи трансферите во Кина биле многу комплицирани. Му објаснив дека не може да замине на ваков начин и дека сме подготвени да преговараме со клубот од Кина. Невозможно е да го пуштиме капитенот за без пари, тоа ќе биде опасен преседан и лош исклучок. Тоа е целата приказна, состанокот беше отворен и искрен“, изјави Флорентино Перез кој притоа откри дека Серхио Рамос во моментов е најплатениот играч на „Кралевите“, но не ја откри точната сума.
Понудата од Кина, неофицијално, изнесува 35 милиони евра на годишно ниво во следните три години, а доколку се реализира овој трансфер, Рамос би бил третиот најплатен играч на светот зад Меси и Нејмар.
