Милевски го носи Чолаковски од Мелбурн сити во македонскиот дрес

429

Еден од најталентираните фудбалери на австралискиот суперлигаш Мелбурн сити, Стефан Чолаковски прифати во иднина да настапува во македонскиот дрес.

По завршните разговори со селекторот на младата репрезентација Благоја Милевски, 20-годишниот Чолаковски и официјално ќе биде на располагање на репрезентацијата до 21 година низ квалификациите за пласман на ЕП 2023, со отворена желба потоа да го облече и сениорскиот дрес на Македонија.

„И дефинитивно може да кажам дека за престојниот квалификациски циклус во македонските редови ќе го имаме и Стефан Чолаковски, кој по нашиот последен разговор официјално се одлучи да игра за Македонија. Низ неколкуте разговори со Чолаковски, кои ги имавме и со тим-менаџерот на репрезентацијата Зоран Зафиров, јасна е на крајот определбата да биде на располагање на националниот тим“ – ни изјави селекторот Благоја Милевски.

Чолаковски прифати да биде со репрезентацијата и на мартовскиот меѓународен турнир во Анталија каде Македонија ќе игра со Словачка, Бугарија и со Казахстан, но само поради австралиските ковид-протоколи тоа во моментов е неизводливо.

„Планиравме првото негово приклучување да биде на турнирот во Анталија, но поради строгите здравствени протоколи во Мелбурн едноставно тоа во моментов беше неизводливо“ – дополнува Милевски.

Стефан Чолаковски (роден 2000 година) игра на деснокрилната офанзивна позиција. За првиот тим на Мелбурн сити, еден од најдобрите австралиски тимови кој е дел од групацијата тимови во сопственост на Манчестер сити, веќе има одиграно и 11 натпревари сезонава.

Стручниот штаб на младата репрезентација на Македонија и ФФМ се во преговори за ангажман и на младиот фудбалер од италијански Киево, Даниел Павлев во иднина да го носи националниот дрес, но досега нема потврда од негова страна на поканата да игра за македонската репрезентација.