Почна работниот ручек на премиерите на Северна Македонија и на Грција
Почна работниот ручек во Атина на премиерите на Северна Македонија и на Грција, Зоран Заев и Киријакос Мицотакис.
Од македонска страна, на работниот ручек присуствуваат и вицепремиерите Никола Димитров (за европски прашања) и Фатмир Битиќи (за економија), како и шефот на дипломатијата Бујар Османи.
Ова е прва средба Заев-Мицотакис, по изборите во земјава, односно по изборот на новата влада на СДСМ и на ДУИ.
Заев е втор ден во Атина, на конференција на „Економист“, на дискусии и средби посветени на она што, по членството во НАТО, е следна стратегиска цел на земјава – членство во ЕУ.
По смената на власта во Грција, денешната е трета средба на Заев и Мицотакис како премиери – по средбите во септември 2019 година, во рамки на Генералното собрание на ОН во Њујорк и лани во ноември на Самитот во Солун.
