Во аптеките во Грција се дистрибуираат бесплатните тестови за Ковид-19 за домашна употреба

197

Бесплатните тестови за Ковид-19 за домашна употреба (т.н. селф тестови), се очекува од утре да бидат достапни во аптеките во поголемите грчки градови, a од петок и во целата земја. Во првата фаза овие тестови ќе бидат наменети само за средношколците на возраст од 16 до 18 години и за нивните професори.

Процесот на дистрибуција е во тек и се спроведува во 11.000 аптеки. Според грчките медиуми, секоја аптека ќе добие по 75 тестови, а попладнево се очекува да биде отворена специјалната платформа за нивно добивање.

Дел од фармацевтите, говорејќи за грчките медиуми велат дека им стигнале пакувања од 25 тестови, а не по еден, што за нив значи дека ќе треба да ги отворат и да ги распределат во исто толку индивидуални пакувања.

Според грчката Влада, „селф тестовите“ се дополнителна алатка во борбата со Ковид-19, но и дополнителна алатка во процесот на олабавување на рестрикциите, со оглед на тоа дека ќе бидат задолжителни за отворањето на училиштата, во првата фаза на повисоките класови од средните училишта.

Учениците и просветните работници задолжително ќе треба секоја седмица да се тестираат со домашните тестови, 24 до 48 часа пред почетокот на наставата.

При негативен резултат ќе добиваат потврда што треба да ја носат на училиште, а без потврда, нема да можат да ја следат наставата.

На специјалната интернет платформа ќе се пријавуваат позитивните случаи, но и негативните, доколку станува збор за категорија граѓани за кои домашното тестирање ќе биде задолжително и ќе биде потребно да имаат соодветна потврда.

За секој граѓанин предвиден е по еден бесплатен тест седмично, во следните два месеци.

Портпаролката на грчката Влада Аристотели Пелони на брифингот во понеделникот изјави дека иако „селф тестовите“ даваат можност за лична заштита, сепак, важно е да нема недоразбирање и при негативен резултат да нема опуштања кај граѓаните.