Косовската полиција во вторникот уапси две лица, како осомничени дека создале група во апликацијата Вибер, а во неа биле членови повеќе од 7.000 луѓе, кои разменувале информации за локациите на полициските патроли.
-Единицата за истраги приведе две лица од албанска националност. Од осомничените биле конфискувани два смарт телефони, а по наредба на обвинителот, по интервјуирањето, тие биле ослободени во редовна процедура, се вели во 24-часовниот извештај на Косовската полиција, јавува Радио слободна Европа.
По полициската акција, Вибер групата повеќе не функционира. Нејзините членови меѓу себе се информирале за полициските радарски контроли како и други полициски контроли и преку фотографии. Пред неколку недели Радио слободна Европа известуваше за функционирањето на ова група веќе подолго време. За истата група беше информирана и косовската полиција.
