По помалку од 48 часа од објавувањето на промоцијата на Суперлигата, целата идеја за новото елитистичко фудбалско натпреварување се распадна како резултат на неверојатниот притисок од навивачите, јавноста, Уефа и Фифа, па дури и државните влади.
Одлуката за Суперлигата толку многу го разбесни светот што дури и моќната Уефа, долгогодишен симбол на корупција и фудбалски криминал, изгледа како невина жртва на алчни мегаломани.
Прв се откажа Манчестер Сити, следен од петте преостанати англиски клубови, а денес започнаа да отстапуваат и клубовите од другите земји. Подоцна, Атлетико Мадрид и Милан и Интер ги објавија своите одлуки за напуштање на Суперлигата. Ова значи дека само Реал Мадрид, Барселона и Јувентус сè уште и се верни.
Андреа Ањели, претседател на Јувентус и потпретседател и главен идеолог на Суперлигата, коментираше за брзиот колапс на неговиот бомбастично најавен проект.
“Мојот телефон не престана да ѕвони во последните 24 часа. Не можам ни да кажам колку клубови ми се јавија и ме прашаа што треба да направат за да играат во Суперлигата”.
„Газета дело Спорт“ објави дека новата Лига на шампиони може да започне пред 2024 година, кога треба да започне според планот на Уефа. Причината е хаосот предизвикан од клубовите со создавањето на Суперлигата.
Новата Лига на шампиони ќе има 36 клуба, четири повеќе од сегашните и ќе се играат повеќе натпревари и клубовите ќе заработат повеќе пари.
Јувентус издаде нејасно соопштение. Не е јасно дали останува во Суперлигата или се повлекува.
„Јувентус е свесен дека јавната дебата што следеше по објавувањето на започнувањето на Суперлигата принуди некои клубови да се повлечат од проектот, но процедурата потребна за ваков потег договорен меѓу членовите на Суперлигата не е завршен како што беше замислено, но сè уште сме убедени во спортската, комерцијалната и правната вредност на проектот. Остануваме посветени на градењето трајни вредности за компанијата и фудбалското движење како целина “.
Милан се повлече од Суперлигата.
“Ја прифативме поканата за учество во Супер лигата со вистинска намера да им дадеме на љубителите на фудбалот најдобро можно натпреварување. Промената не е секогаш лесна, но еволуцијата е неопходна за напредок. Европскиот фудбал се развиваше и се менуваше со децении. Мора да го почитуваме гласот на оние кои го сакаат овој прекрасен спорт “, е пораката на Милан во која се додава дека ќе продолжи да работи на обезбедување одржлив модел за фудбалот.
И покрај фактот дека само три од 12-те клуба што го иницираа ова ексклузивно натпреварување, основано пред три дена, остануваат во Суперлигата, Барселона нема намера официјално да реагира или јавно да проговори за проектот предводен од шефот на Реал, Флорентино Перез.
