Ова беше соопштено на денешната прес-конференција на првиот човек на клубот, Бертус Сервас.
„Компанијата ВИВЕ е сериозно погодена од кризата поради коронавирусот, многу од продавниците се затворени, па јас морам да бидам одговорен менаџер и да се грижам за илјадниците вработени“, изјави Сервас, кој и понатаму ќе остане на функцијата претседател на Кјелце.
Ова е само дополнение на финансиските проблеми кои полскиот шампион ги имаше и претходно, поради што дел од ракометарите најавија заминување. Непријатностите на Кјелце, сепак, би можеле да му се погодат на Вардар, кој би можел да ја искористи можноста и во своите редови да си го врати Игор Карачиќ.
Хрватскиот интернационалец во повеќе наврати има изјавено дека срцето му е во Скопје, а и новиот газда на црвено-црните, Михајло Михајловски, во неколку наврати изјави дека би сторил сѐ за да го ангажира, секако ако стане достапен на пазарот со оглед на неговиот, сѐ уште валиден договор со Кјелце.
