Иако речиси секој град изгледа магично кога ќе се украси со новогодишни светилки, а особено кога ќе го покрие и првиот снег, некои европски градови посебно се истакнуваат од останатите.
Колмар е град во француската регија Алзас, сместен точно под источното подножје на планината Вогези, а низ градот поминува реката Лаух која со канал е поврзана со реката Рајна.
Основан во 9-от век, Колмар е вистинско мало гратче од светот на бајките, обоено со разнобојни куќи, мали продавници, мостови, канали и калдрмисани улици.
Има околу 86.000 жители, а го нарекуваат и „градот на виното и уметноста“. Поради прекрасните продавници, канали и фонтани, Колмар е познат и како „мала Венеција“.
За време на новогодишните и божиќните празници, ова гратче изгледа како од бајка. На секој чекор се чувствува магијата, радоста и возбудата на децата, незаобиколниот мирис на вареното вино…
А од 1998 година, градот ги инспирира своите жители да ја користат имагинацијата за да го доловат божиќниот дух така што се организираат натпревари во 3 категории: најубаво украсена куќа, прозорци и балкони, најубав божиќен пазар и најубаво украсен излог на продавница.
Ние денеска ви издвојуваме неколку најубави фотографии од Инстаграм кои сликовито ќе ви ја доловат магијата на Колмар пред претстојните празници.
